Attgroinga av kulturlandskapet fører mange stader til store endringar i det biologiske mangfaldet. Dei viktigaste grunnane til at dette skjer er rovdyrpolitikken og landbrukspolitikken.

Nokon trur at turistar kjem til Noreg for å oppsøke vår urørte natur. Det er nok i beste fall berre delvis rett. Reiselivsjournalist Jens A.Risnes vurderer Noreg som verdens vakraste land fordi vi har eit kulturlandskap som skil seg ut. Vårt kulturlandskap er eit resultat av ein stolt 4500 år gamal tradisjon i menneskeleg påverknad. For reiselivsnæringa er kulturlandskapet heilt avgjerande for å trekke turistar til landet vårt. Det er altså vår berørte natur som skapar det attraktive reiselivsproduktet som mange kjem til Noreg for å oppleva.

Det er jordbruket som gjennom tidene har vore den viktigaste menneskelege påverknadsfaktoren. Aktivt jordbruk med beitedyr har sikra skjøtsel og stell. Difor må husdyrhaldet oppretthaldast og helst aukast monaleg dersom det biologiske mangfaldet skal bevarast og kulturlandskapet oppretthaldast. Ei vidare nedtrapping av jordbruket vil føre til tap av artsmangfald.

Jordkloden står også overfor store utfordringar. Vi forventar ein befolkningsvekst som fram til 2050 vil gje oss eit folketal 9 milliardar menneske, mot dagens 6,9 . Berre i Noreg vert vi 1 million fleire i løpet av dei neste 20 åra. Ein større del av befolkninga endrar sine forbruksvanar, noko som fører til auka etterspørsel etter mat.
Vidare er det eit sørgjeleg faktum at over ein tredjedel av all fullt brukbar mat i den rike delen av verda, vert kasta ! Samstundes lir éin milliard menneskjer av alvorlig underernæring. Berre i Noreg kastar vi mat for 10 mrd kroner i året. Eller over ein kilo god mat i veka.
Samstundes ser vi at klimaendringar og naturkatastrofar lammar matproduksjon i store og viktige områder i verda.

Lønsemd og forbetra inntektsmoglegheiter er grunnlaget for eit aktivt landbruk i heile landet. Dette vil kosta, men eg trur at den norske befolkning er villige til å vere med å ta del i ei framtidsretta investering. Ein ny undersøking viser mellom anna at 8 av 10 nordmenn ynskjer auka matproduksjon i Noreg i takt med aukande folketal. Difor er det grunn til å møta den nye stortingsmeldinga om landbruket og vårens jordbruksoppgjer med optimisme og forventningar.

Undersøkingar i delar av kjerneområdet for ulv i Akershus, Østfold og Hedmark utført av NINA syner at eit høgt antal raudlisteartar er i ferd med å gå tapt fordi det tradisjonelle jordbruket vert pressa ut. Frå andre delar av landet varslar Mattilsynet at det kan bli aktuelt å pålegga beitenekt. I staden for å gjere noko med sjølve årsaken krev ein i praksis avvikling av heile beiteområde. Dette er ekspropriasjon av beiteretten – utan erstatning. Varselet fra Mattilsynet er også i strid med prinsipp som vart nedfelt av Høgsterett i den prinsipielle Rendalsdommen.

Der vart dyreeigar sitt ansvar for dyrevelferd vurdert opp mot Statens ansvar for å ivareta rovdyrbestanden. Høgsterett fann at Mattilsynets sitt vedtak i Rendalssaken låg utanfor tilsynets kompetanse.

Rovdyrpolitikken er ein viktig faktor for landbruket. Partia på Stortinget har no byrja samtalane om eit nytt rovdyrforlik. Alle politikarar må her vise praktisk vilje til å einast om tiltak som kan dempa konfliktane.

I praksis er det ikkje noko alternativ til ein ny rovdyr og jordbrukspolitikk.